सुध लेले मितान

हिरदे मोर अगाद परेम खान,
जईसे गंवई म पखरा खदान |
गुन के छान के तहुं पहिचान ,
फेर जतका लेबे ले ले मितान |१|

बिसबास नई हे त कर बिसबास ,
छुटत हे डोरी त भर ले सांस |
जिथैं जिनगी सब आस म ,
तै काबर उरझे हस मया पास म |
काबर के जिनगी चलथे,
इही आस अउ बिसबास म |२|

लगथे चिनहत नई हस ,
काबर के जस पागे हस |
तभेच पुछे कोन हस ?
मय कमिया तैं किसान |
गोठियाबो ,
पहिली चिन ले ले मितान |३|

लगायेन डुबकी दहरा म ,
धरेन मछरी डबरा म |
उतरय जउन चोहरा म ,
लगायेन टिका माथ गोबरा म|
सेकाय रोटी अंगरा म,
खायेन दही संग दोहरा म | ४|

आईस के नई आईस सुरता ,
गांव के इसकुल  म संग बनेन मुरगा |
जेखर बर संगे होय रहेन झगरा ,
कुछु आईस ? ओ.. टुरी दुरगा |
कइस्से आवय ? येखर सुरता ,
बरसत पानी म खेलेन डोंगा |५|

संग म जान देखन गउरी- गऊरा ,
होय आघु -पाछू खेलन दउरी -दऊरा |
दईहान के गिल्ली अउ डंडा ,
खेल- खेल न होवन जंगा |
मोर खातिर लेवस तहुं पंगा ,
छोटकन रेहे देखईया होवैं चम्भा |६|

अतको म नइहे त कहत नन्ह कुत की ,
दउरत जान टेड़न कुद -कुद की |
लोटा -गिलास भरन उचकी- बुचकी ,
घोलन-घोलन होजन फुतकी-फुतकी |
बन के जसोदा कहय कन्हईया काकी ,
खोजत रोवय महतारी हमर देवकी |७|

चढगे ये तैं कहां अतका ऊचान ,
राखे ल तिवरा बनात रहेंन मचान |
सकेले रखे मति ल थोरको तान ,
मोरो गोठ ले सुध ले ले मितान |८|

            सुखन प्रसाद जोगी "जोगी जी"
            ग्राम - डोंड़की (बिल्हा)
            जिला- बिलासपुर  (छ.ग.)
            मो. नं. 8717918364